دموع ام الشهيد **********
ابكى ياقلبى على شباب
مات برصاص غدر جبان
ابكى ياعين على ام
ابنها مات فى الميدان
ابكوا معايا على صبية حلوة
اتقطف عمرها قبل الاوان
آآآآآآآآآآه يابنتى
كنت وردة جميلة طالة
تفرحى بحلم بكرة
وكنت بحلم معاكى
اشوفك عروسة هالة
نزلتى تنادى بأعلى صوتك
عايزة اعيش انسانة حرة
عايزة افرح بشبابى
واضحك من قلبى مرة
عايزة انسى هم امبارح
واعتبره ذكرى
عايزة انسى العيشة المرة
اه يابنتى ياضنايا
ال آآآآآآآآه بتصرخ جوايا
قلبى محروق مـ الشظايا
والعين تعبت من بكايا
حسبنا الله فيك ياظالم
ازاى حتهرب من رب قادر
راح ينتقم لدم الضحايا
آه ياورد الجناين
دمكم مش حيروح هدر
كل نقطة دم منكم
حيدفع لها الغادر التمن
ضحيتوا بحياتكم
لجل ماتحرروا الوطن
لجل مستقبل ولادكم
ترسموا خطوطه بالامل
صرختم باعلى صوتكم
قلتم انا المصرى
شامخ من قديم الازل
نازل اعيد امجادى
نازل احرر بلادى
آه والف آآآآه عليكم يااولادى
